МБОУ "Алтанская СОШ с УИОП им. Е.С. Никитиной"
Ийэ, Аҕа күннэрин көрсө — дьиэ кэргэн түһүлгэтэ
Саха сиригэр Ийэ, оттон дойду үрдүнэн Аҕа күннэрин көрсө, оскуолаҕа дьоро киэһэ буолан ааста. Алын кылаас үөрэнээччилэрэ төрөппүттэрин кытта сэттэ ыал буолан мустан, бэрт сэргэх, тыҥааһыннаах күрэхтэһиигэ кытыннылар. Бу күн оскуола иһэ оҕо саас саҥатынан, дьоллоох күлүүнэн туолла.
Бастакы түһүмэх — илиинэн оҥоһук быыстапката. Хас биирдии дьиэ кэргэн дьиэҕэ оҥорон аҕалбыт араас эгэлгэ туһалаах малларын көрдөрдүлэр. Оҕо уонна төрөппүт бииргэ түмсэн үлэлээбиттэрэ харахха быраҕыллар:
-1 кылаастан Кира Яковлева ийэтинээн Василина Васильевналыын мастан туһалаах долбууру, оттон Дима Пономарев аҕатынаан Михаил Дмитриевичтыын тупсаҕай оҥоһуулаах сиппиири чочуйбуттар.
-2 кылаас үөрэнээччитэ Аселина Новикова ийэтинээн Айсена Михайловналыын кыраһыабай хоппону, 3 кылаастан Егор Адамов ийэтинээн Вероника Карловналыын ураты дизайыннаах светильнигы айан таһаарбыттар.
Данил Неустроев ийэтинээн Валентина Кимовналыын кыракый медузалары эрэһиинэ бэрчээккэттэн оҥорон өҥнөөх уулаах дьикти интерьер киэргэлигэр кубулуппуттар.
-4 кылаастан Костя Сутаков ийэтинээн Светлана Михайловналыын сиэдэрэй копилканы оҥорбуттар.
Ону таһынан, Колесовтар дьиэ кэргэн — Максим, Денис уонна ийэлэрэ Галина Егоровна — макраменан оҥоһуллубут сабыы (панно) нөҥүө уустук тиэхиньикэни баһылаабыттарын итэҕэттилэр.
Иккис түһүмэх — «Таай, туох сытарый?» Сабыылаах хоппо иһигэр кистэммит тэрили төрөппүт илиитинэн тутан-хабан эрэ быһааран эппитин, оҕото сэрэйэн таайыахтаах. Манна тарбах имэ, ийэ-аҕа сылааһа уонна оҕо болҕомтото бииргэ түмүлүннүлэр.
Үһүс түһүмэх — дьиэ кэргэн туһунан араас ойулуктары таайыы буолла.
Биктэриинэҕэ кыттааччылар да көрөөччүлэр даҕаны үксүн билэр ойулуктара буолан сөптөөх эппиэттэр иһилиннилэр.
Төрдүс түһүмэх — «Эн-мин?»
Бу түһүмэххэ таптал уонна өйдөһүү тургутуга буолла. Оҕо төрөппүтүн, ону тэҥэ төрөппүт оҕотун туһунан
ыйытыыларга хоруйдаатылар.
Оҕолор ийэлэрэ хайа дойдуга оҕо саастара ааспытын, тугу сөбүлээн астыылларын, сөбүлүүр дьүһүннэрин, онтон ийэлэр оҕолоро иллэҥ кэмигэр тугу ордороллорун, инникигэ туох профессиятын баҕаралларын, сөбүлүүр уруоктарын туһунан үксүн сөпкө таайсан, ардыгар сиирэ-халты да буоллар бэйэ-бэйэ туһунан саҥа арыйыылары оҥордулар, олус диэн интириэһинэй түһүмэҕинэн оонньуу түмүктэннэ.
Тэрээһин биир кэрэ көстүүтүнэн кылаастар эҕэрдэ нүөмэрдэрэ буолла. Хас биирдии кылаас ырыанан уонна хоһоонунан ийэлэргэ, аҕаларга тапталларын, махталларын тиэртилэр, киэһэни сэргэхситтилэр.
Күрэс түмүгүнэн дьүүллүүр сүбэ, хас биирдии кыттааччыга анал ааттары туттаран туран, сэмэй бэлэхтэри туттарда. Дьүүллүүр сүбэ састаабыгар алын кылаас учууталлара киирдилэр. Дьоро киэһэни иилээн-саҕалаан ыыппыт, тэрийбит Сардана Васильевна Харлампьеваҕа төрөппүттэр уонна оҕолор барҕа махталларын биллэрдилэр.
Тэрээһинтэн бары сүргэлэрэ көтөҕүллэн, үөрэн-көтөн, инникигэ эрэллээх, дьиэ кэргэн истиҥ сылааһынан туолан тарҕастылар.
Хаартыскалар бу сигэҕэ бааллар:
https://disk.yandex.ru/d/hWDIEqcL15c02w
#ИйэКүнэ #АҕаКүнэ Если у вас установлено приложение,
вы можете сразу перейти в канал