Госпаблик МБОУ "Хаяхсытская СОШ имени А. П. Илларионова"
🕊️ Сырдык өйдөбүл, үйэлээх кэриэстэбил!
Балаҕан ыйын 19 күнэ — Чурапчы улууһугар Кутурҕан уонна кэриэстэбил күнэ. Бу күн хас биирдии Саха киһитин сүрэҕин ортотунан ааһар, устуоруйабыт саамай курус уонна ыарахан ураты күнэ буолар.
1942 сыл ыар күһүнүгэр Аҕа дойду Улуу сэриитин кытаанах кэмигэр, Чурапчы улууһун 41 холкуос нэһилиэнньэтэ туох да бэлэмэ суох, хотугу улуустарга күүс өттүнэн көһөрүллүбүтэ. Хас биирдии дойдулаахха болдьомунан 16 эрэ киилэ маллаах-саллаах, оҕотуттан эмээхсинигэр тиийэ ыраах, тымныы уонна билбэт сирдэригэр айаннаабыттара.
Бу сүрдээх ыарахан усулуобуйаттан, аччыктааһынтан уонна ыарыылартан сылтаан 2 тыһыынча кэриҥэ киһи, ордук оҕолор уонна кырдьаҕастар, дойдуларын иккиһин көрбөт үтүө мөссүөннэрин хоту сиргэ хаалларбыттара. Бу ыар сүтүк Чурапчы сирин-уотун эрэ буолбакка, бүтүн Саха сирин сүрэҕин бааһа буолан үйэлэргэ хаалбыта.
Биһиги оскуолабытыгар хас биирдии кылааска кылаас чаастара ыытыллыннылар. Ону таһынан нэһилиэк «Албан аат болуоссатыгар» миитиҥҥэ эһээлэрбит, эбээлэрбит, аймахтарбыт сырдык кэриэстэрин ахтан-санаан «Өйдөбүл чүмэчитэ» акцияҕа кыттыыны ыллыбыт.
Биһиги сорукпут — бу ыар алдьархайы хаһан да умнубат буолуу, оччотооҕу дьон тулуурун, хорсун быһыытын сыаналыы үөрэнии. Дойдуларыгар төннөр туһугар олохторун биэрбит, ыарахан сылларга сүгүрүйбүт биир дойдулаахтарбыт сырдык кэриэстэбиллэрэ өрүү тыыннаах буолуоҕа! Если у вас установлено приложение,
вы можете сразу перейти в канал